Banesa të përmbytura në Novoselë, flet qytetari: Kam pastruar ujin me fshesë gjatë natës, gruan e kam të paralizuar

Në fshatin Bishan të njësisë administrative Novoselë, situata është përkeqësuar që prej orës 02:00 të mëngjesit dhe vijon ende.

Si pasojë e rritjes së ndjeshme të prurjeve të lumit Vjosë, rreth 20 banesa janë përmbytur. Edhe pse gjatë ditës së sotme niveli i lumit ka shënuar rënie, uji vazhdon të jetë i pranishëm në banesat e banorëve.

Familjarët shprehen të shqetësuar, pasi kanë kërkuar ndërhyrje dhe ndihmë nga institucionet përkatëse, por deri më tani nuk kanë marrë asnjë reagim.

“Në orën 2 të mëngjesit uji arriti në pikën kritike. E kam pastruar me fshesë, gruan e kam të paralizuar dhe e kam përballuar vetëm. Interesimi ka qenë zero. Uji brenda ka hyrë 70 cm”, shprehet qytetari Petrit Alia.