Zelensky: Putini po feston ditëlindjen me vikt'ima, raketat ruse godasin Ukrainën

Numri i viktimave nga një sulm rus që shkatërroi një pallat pesëkatësh në Pryluky, në rajonin e Chernihivit, të mërkurën, 7 tetor, ka shkuar në nëntë, mes tyre tre fëmijë, ndërsa 40 persona janë plagosur, përfshirë shtatë fëmijë, njoftoi Shërbimi Shtetëror i Emergjencave të Ukrainës (DSNS).

Ekipet e shpëtimit kanë nxjerrë të gjallë nga rrënojat 12 persona, mes tyre një fëmijë. Operacionet e kërkim-shpëtimit dhe çmontimi i strukturave të dëmtuara vijojnë, pasi besohet se ende mund të ketë persona të bllokuar nën rrënoja. Psikologët e DSNS-së u kanë ofruar ndihmë 36 personave në vendngjarje.

“Sot, në ditëlindjen e Putinit, ushtria ruse i ‘dhuroi’ atij shkatërrimin e një pallati banimi në Pryluky”, shkroi presidenti Volodymyr Zelensky në Telegram. “Ishte një pallat i zakonshëm pesëkatësh.”

   
Ai shtoi se ende mund të ketë njerëz të bllokuar nën rrënoja, ndërsa ekipet e emergjencës po vijojnë operacionet e kërkim-shpëtimit.

Nëntë të vrarë, mes tyre tre fëmijë, në Pryluky

Sipas presidentit Zelensky, deri të mërkurën në mëngjes ishin konfirmuar pesë viktima në Pryluky. Mes 26 personave të plagosur ishin edhe pesë fëmijë.

“Shpëtimtarët po punojnë pa ndërprerje në vendngjarje, duke bërë gjithçka të mundur për të gjetur çdo person”, tha ai.

Shifrat e viktimave mbeten paraprake, ndërsa ekipet vijojnë kërkimet në rrënoja.

Zelensky nuk dha menjëherë detaje mbi llojin e raketës që goditi pallatin apo mbi gjendjen e personave të plagosur.

Të paktën 15 të vrarë në të gjithë Ukrainën

Sulmi në Pryluky ishte pjesë e një vale masive sulmesh ruse gjatë natës, që goditën Kievin dhe 12 rajone të Ukrainës.

Sipas Zelenskyt, pesë pallate banimi u dëmtuan në Dnipro, ndërsa katër ndërtesa të larta u goditën në Kremenchuk. Dy persona u vranë dhe tetë të tjerë u plagosën në sulmet që prekën këto dy qytete.

Një dron rus dëmtoi gjithashtu një pallat banimi në Zaporizhzhia.

Në Kiev, forcat ruse vranë dy persona, ndërsa dy të tjerë u vranë në Oleksandriia, në rajonin e Kirovohradit.

Shpërthime të shumta u dëgjuan në Kiev herët të mërkurën, disa orë pasi Zelensky paralajmëroi se inteligjenca ukrainase kishte zbuluar përgatitjet ruse për një sulm masiv.

Dëme u raportuan në lagjet Obolonskyi, Podilskyi, Darnytskyi dhe Shevchenkivskyi të kryeqytetit. Ndër objektet e goditura ishin magazina dhe struktura të tjera jo-banuese.

Rusia lëshoi 70 raketa

Zelensky tha se Rusia përdori gjithsej 70 raketa, krahas dronëve të tipit Shahed, në atë që ai e përshkroi si “një nga sulmet më të pabesa”.

Sulmi me raketa përfshiu një numër të konsiderueshëm raketash balistike, ndërsa mbrojtja ajrore ukrainase arriti të kapte vetëm një pjesë të tyre.

Një nga objektivat kryesore të Rusisë ishte infrastruktura energjetike e Ukrainës, ndërsa Moska po intensifikon përpjekjet për të dëmtuar sistemin energjetik të vendit përpara sezonit të dimrit.

“Rusët donin të godisnin në mënyrë të dhimbshme dhe demonstrative”, tha Zelensky.

Presidenti e përshkroi përdorimin e raketave balistike ruse si sfidën më të vështirë për mbrojtjen ajrore të Ukrainës dhe përsëriti thirrjen drejtuar vendeve partnere për sisteme shtesë Patriot dhe raketa interceptuese.

“Paketat e mbrojtjes ajrore janë tashmë një nevojë jetike për ne”, tha Zelensky. “Prandaj, çdo ditë kërkojmë raketa për sistemet Patriot, të cilat mund dhe duhet të mbrojnë realisht jetët e njerëzve këtu, në qiellin ukrainas.”