Vendoset rekordi historik në NBA / Fanella e Michael Jordan shitet me çmim marramendës

Një fanellë e legjendës së basketbollit, Michael Jordan, është shitur për 14 milionë dollarë, duke vendosur një rekord të ri për objektet koleksionuese të lidhura me basketbollin.

Fanella e kuqe e Chicago Bulls, e firmosur nga Jordan dhe e veshur gjatë finales së NBA-së në vitin 1998, u shit përmes një marrëveshjeje private, të ndërmjetësuar nga shtëpia e ankandeve Hunt Auctions. Blerësi është Ron Firman, një investitor në sektorin e pasurive të paluajtshme në Miami.

Atë mbrëmje (5 qershor 1998), ylli amerikan shënoi 37 pikë dhe ndihmoi Chicago Bulls të fitonte me rezultatin 93-88, duke barazuar serinë finale në 1-1.

Në fund, Bulls triumfuan në gjashtë ndeshje, duke fituar titullin e gjashtë dhe të fundit të Michael Jordan me skuadrën nga Çikago. Pikërisht sezoni 1997-1998 u bë më vonë subjekt i dokumentarit të famshëm The Last Dance.

Shitja prej 14 milionë dollarësh e bën këtë fanellë objektin më të shtrenjtë të koleksionimit në historinë e basketbollit. Megjithatë, ajo renditet e dyta në mesin e fanellave sportive të shitura me çmime rekord, pas fanellës së legjendës së bejsbollit Babe Ruth, e cila u shit për 24.12 milionë dollarë në vitin 2024.

Interesi i jashtëzakonshëm për objektet e përdorura nga Jordan gjatë finales së vitit 1998 është dëshmuar edhe më parë. Një fanellë e veshur në ndeshjen e parë të finales u shit për rreth 10.1 milionë dollarë në vitin 2022, ndërsa një tjetër, e përdorur në ndeshjen e tretë, arriti rreth 12.26 milionë dollarë në shtator 2026.