Shqiptari dyshohet se organizonte sulmet me granata në Athinë, drejtonte bandën e gjobëvënies nga burgu

Një operacion i madh policor ka nisur që në orët e para të mëngjesit, me qëllim shkatërrimin e një organizate kriminale, anëtarët e së cilës dyshohet se janë përfshirë në gjobëvënie ndaj biznesmenëve, shpërthime me granata dhe një tentativë vrasjeje.

Sipas informacioneve nga burimet policore, hetimi po drejtohet nga FBI-ja greke. Në krye të organizatës dyshohet se qëndron një shtetas shqiptar, i cili po vuan dënimin në burgun e Trikalës.

Bashkëpunëtorët e tij më të afërt dyshohet se janë një i burgosur rom në burgun e Malandrinos dhe dy të burgosur egjiptianë, që ndodhen në burgjet e Avlonës dhe Malandrinos.

Në kuadër të operacionit, policia ka arrestuar edhe pesë persona që jetojnë në rajonin e Atikës. Ata dyshohet se janë përfshirë në veprimtari të ndryshme kriminale, përfshirë gjobëvënie, vjedhje në dyqane, shpërthime dhe tentativë vrasjeje.

Sipas hetimeve, grupi dyshohet se qëndron pas dy shpërthimeve me granata, të ndodhura në fillim të shtatorit në dy biznese në qendër të Athinës. Autorët iu afruan ambienteve dhe hodhën granata, duke shkaktuar dëme materiale.

Një tjetër incident është regjistruar në fillim të tetorit, kur anëtarë të dyshuar të organizatës hodhën një granatë jashtë një biznesi. Pajisja shpërthyese nuk shpërtheu, ndërsa brenda lokalit ndodheshin tetë klientë.

Hetimet vijojnë për zbardhjen e plotë të aktivitetit të organizatës dhe rolin që dyshohet se ka pasur secili prej anëtarëve të saj.