“Menduam se ishim të sigurt ”/ Matt Damon tregon si mbeti pa para me Ben Affleck pas suksesit të “Good Will Hunting”

Matt Damon ka rrëfyer se, pavarësisht suksesit të madh të filmit “Good Will Hunting”, ai dhe shoku i tij i vjetër Ben Affleck mbetën pothuajse pa para vetëm pak kohë pasi kishin bërë marrëveshjen e parë për skenarin.

Gjatë një interviste në podcastin “New Heights”, Damon tregoi se ai dhe Affleck e shitën skenarin e filmit për 600 mijë dollarë, shumë që në atë kohë u dukej si një pasuri e jashtëzakonshme.

Megjithatë, pas taksave, komisioneve të agjentëve dhe shpenzimeve të tjera, secilit prej tyre u mbetën më pak se 150 mijë dollarë.

Dy miqtë vendosën fillimisht të shpenzonin një pjesë të parave për makina të reja dhe morën me qira një apartament në Los Angeles. Por entuziazmi nuk zgjati shumë.

Damon kujtoi se vetëm një vit më vonë, ai dhe Affleck e kuptuan se paratë po mbaronin dhe se duhej të gjenin punë të reja.

“Ne menduam se ishim të sigurt për gjithë jetën”, rrëfeu Damon, duke shpjeguar se në atë kohë nuk e kuptonin se sa shpejt mund të shpenzohej një shumë e tillë.

Ironikisht, një refuzim në një audicion ishte pikërisht ajo që i shtyu dy miqtë të krijonin vetë një mundësi. Ata nuk arritën të merrnin një rol në filmin “Primal Fear”, ndaj vendosën të shkruanin skenarin e tyre.

Kështu lindi “Good Will Hunting”, filmi që më vonë do t’u ndryshonte jetën.

I publikuar në vitin 1997, filmi u shndërrua në një sukses të madh ndërkombëtar, duke arkëtuar rreth 225 milionë dollarë në kinema dhe duke marrë nëntë nominime për Oscar.

Filmi fitoi dy çmime Oscar: Robin Williams u shpall aktori më i mirë në rol dytësor, ndërsa Damon dhe Affleck fituan çmimin për skenarin më të mirë origjinal.

Dy aktorët kanë ruajtur miqësinë e tyre për dekada dhe kanë vazhduar të bashkëpunojnë në projekte të ndryshme filmike.