Prishtina vendos tarifë për mjetet e rënda që hyjnë në zonat qëndrore të kryeqytetit

Komuna e Prishtinës ka vendosur tarifë për mjetet e rënda që hyjnë në kryeqytet, ndërsa e ka larguar atë për të gjitha veturat, ashtu siç ishte paraparë.

Kuvendi Komunal i Prishtinës ka miratuar të premten Rregulloren për tarifat e mjeteve që hyjnë në zonën qendrore të kryeqytetit, duke hequr nga propozimi fillestar tarifën prej 2 eurosh për çdo veturë.

Aktivizimi i tarifës do të bëhet vetëm përmes një vendimi të Kuvendit të Kryeqytetit. Rregullorja u miratua me 35 vota për, asnjë kundër dhe dy abstenime.

Sipas rregullores së miratuar, tarifa do të aplikohet vetëm për automjetet e rënda, ndërsa veturat nën 3.5 tonë nuk do të paguajnë për hyrjen në qendër.

Për mjetet me peshë nga 3.5 deri në 7.5 tonë është përcaktuar tarifë prej 5 eurosh, ndërsa për ato mbi 7.5 tonë tarifa do të jetë 10 euro.

Fillimisht ishte propozuar që çdo automjet që hyn në qendër të Prishtinës të paguante nga 2 euro. Ky propozim u kundërshtua nga përfaqësuesit e Partisë Demokratike të Kosovës dhe Lëvizjes Vetëvendosje, pas së cilës u ndryshua përmbajtja e rregullores.

Tarifat nuk do të aplikohen gjatë gjithë kohës. Ato vlejnë vetëm gjatë orëve të ditës, ndërsa gjatë natës dhe në oraret e përcaktuara me rregullore, mjetet e rënda nuk do të jenë të obliguara të paguajnë.

Një tjetër ndryshim i rëndësishëm është mënyra e aktivizimit të tarifës. Ajo nuk do të mund të hyjë në fuqi me vendim të kryetarit të Prishtinës, siç ishte paraparë fillimisht.