“Përdori gjuhë fyese dhe kërcënuese”, grupi i PD kërkon përjashtimin e Taulant Ballës nga Parlamenti (DOKUMENTI)

Grupi parlamentar i Partisë Demokratike i është përgjigjur “flakë për flakë” grupit të PS-së që po kërkon përjashtimin me një muaj të kryetarit Sali Berisha për fyerjen e pretenduar ndaj ambasadorit të BE-së, Silvio Gonzato.

PD, me 7 firma të deputetëve; Belind Këlliçi, Klevis Balliu, Jorida Tabaku, Elda Hoti, Ina Zhupa, Bardh Spahia dhe Eno Bozdo, kërkon përjashtimin e kreut të grupit të PS, Taulant Balla, me 10 ditë, pasi përdori gjuhë fyese në seancën e djeshme parlamentare në Kuvend, duke etiketuar kolegët opozitarë si lehës.

Ishte Belind Këlliçi që i kërkoi dje Niko Peleshit masa ndaj Ballës, por ai kërkoi t’i drejtoheshin Sekretarisë. Sot PD e ka zyrtarizuar kërkesën.

“Përdori gjuhë fyese dhe kërcënuese, Grupi Parlamentar i PD-së kërkon përjashtimin me 10 ditë nga Kuvendi të Taulant Ballës. Grupi Parlamentar i Partisë Demokratike i ka kërkuar Sekretariatit të Etikës përjashtimin me 10 ditë nga punimet e Kuvendit të deputetit Taulant Balla. Në seancën e datës 6 nëntor, Taulant Balla ka përdorur gjuhë fyese dhe kërcënuese ndaj deputetëve të opozitës”, thuhet në kërkesën e PD.

Deputetët e PD që e kanë firmosur kërkesën:

-Belind Këlliçi

-Klevis Balliu

-Ina Zhupa

-Elda Hoti

-Bardh Spahia

-Jorida Tabaku

-Eno Bozdo

Dhe në shkresën zyrtare, grupi i PD me 7 firma nënvizon:

“Për të gjitha sa më lart, në mbështetje të nenit 65/1, pika 1, shkronja “a”, kërkojmë: Mbledhjen e Sekretariatit për Procedurat, Votimet dhe Etikën për shqyrtimin brenda afatit të kësaj kërkese. Marrjen e masës disiplinore Përjashtim nga pjesëmarrja në komisione dhe/ose në seancë plenare për 10 ditë” ndaj deputetit Taulant Balla”.

Kërkesa e PD-së drejtuar Kuvendit dhe kryeparlamentarit Niko Peleshi:

“Sekretariatit për Procedurat, Votimet dhe Etikën, Z. Kryetar i Kuvendit.

Në seancën e datës 06.11.2025, në shkelje të plotë të etikës dhe gjuhës parlamentare, gjatë diskutimit të tij në foltoren e Kuvendit, Kryetari i Grupit Parlamentar të Partisë Socialiste Taulant Balla, ndërkohë që fliste për miratimin e kalendarit dhe programit të punës së Kuvendit, ndërmori një sulm me fyerje dhe gjuhë joparlamentare drejtuar deputetëve të opozitës.

Gjuha joparlamentare dhe fyese, që përfshinë fjalë “lehni”, “rraca e këtyre”, “ta tregoj unë ty”, “gënjeshtar”, etj., gjatë fjalës për kalendarin dhe programin, është shkelje disiplinore sipas nenit 65/1, pika 1, shkronja “a”, ku specifikohet se:

“1.Masa disiplinore “Përjashtim nga pjesëmarrja në komisione dhelose në seancë plenare deri në 10 ditë” i jepet deputetit: a) kur edhe pas tërheqjes së vëmendjes dhe dhënies së vërejtjes nga drejtuesi i seancës/mbledhjes, bën thirrje për përdorim dhune, pengon zhvillimin e rregullt të seancës plenare/ mbledhjes së komisionit, shkakton kaos në seancë plenare/komision, fyen, kërcënon ose dhunon deputetët e tjerë, drejtuesin e seancës, anëtarët e Këshillit të Ministrave, të ftuarit ose persona të tjerë, apo përdor fjalë fyese për Presidentin e Republikës, Kryeministrin ose institucione të tjera shtetërore”.

Kjo sjellje e deputetit Taulant Balla është e përsëritur seancë pas seance, dhe mbetet në cdo rast i pa ndëshkuar. Fyerja dhe kërcënimi ndaj deputetëve të opozitës është papranueshëm dhe duhet të shoqërohet me masën disiplinore përjashtimin me 10 ditë nga seanca plenare dhe komisionet parlamentare.

Prova për përdorimin e gjuhës jo parlamentare, fyese dhe kërcënuese, gjenden në faqen zyratre të Kuvendit, në facebook, gjatë fjalës së deputetit Taulant Balla, lidhur me programin dhe kalendarin e punimeve të Kuvendit. Për të gjitha sa më lart, në mbështetje të nenit 65/1, pika 1, shkronja “a”, kërkojmë:

Mbledhjen e Sekretariatit për Procedurat, Votimet dhe Etikën për shqyrtimin brenda afatit të kësaj kërkese.

Marrjen e masës disiplinore Përjashtim nga pjesëmarrja në komisione dhe/ose në seancë plenare për 10 ditë” ndaj deputetit Taulant Balla”.