Mbyllet burgu i Zaharisë, merret vendimi për të dënuarit me probleme mendore

Pasi Ministria e Drejtësisë vendosi të mbyllë përfundimisht Burgun famëkeq të Zaharisë në Krujë, i konsideruar si “kamp përqendrimi”, kreu i kësaj ministrie, Ulsi Manja, sqaron edhe se ku do të strehohen të burgosurit e këtij burgu.

Gjatë një seance dëgjimore në Komisionin e Ligjeve, Manja tha se ata do të transferohen brenda këtij muaji në burgun e Shënkollit në Lezhë. Ministri tha se Këshilli i Europës kishte rekomanduar që të burgosurit me probleme të shëndetit mendor duhet të kalonin në institucione nën varësinë e Ministrisë së Shëndetësisë. Aktualisht, në Burgun e Zaharisë janë 329 persona të dënuar për vepra të ndryshme penale dhe kryesisht me probleme të shëndetit mendor.

“Më lejoni të jap shifrën e saktë të personave që ndodhen në institucionin e trajtimit të posaçëm, janë 329 persona në Burgun e Zaharisë. Ka një rekomandim të Këshillit të Europës që kjo kategori, persona me masë shëndetësore, do të duhet të kalojnë në administrimin e Ministrisë së Shëndetësisë. Kemi dakordësuar për një zgjidhje tranzitore derisa të kalojnë drejt një institucioni të posaçëm, ne do t’i akomodojmë në bllokun 4 dhe 5 të Shënkollit. Zaharia do të mbyllet brenda nëntorit. Unë pres vlerësimin e fundit nga ekspertët për të marrë në dorëzim vlerësimin e punimeve në bllokun 4 dhe 5, do të firmos kalimin e këtyre personave me masë shëndetësore nga Zaharia tek ai i Shënkollit”, tha Manja.

VENDIMI

Vendimi për mbylljen e institucionit të ekzekutimit te veprave penale të Zaharisë u mor në fillim të këtij muaji pas kërkesave prej vitesh nga institucionet ndërkombëtare. Në këtë burg po shlyejnë dënimet të dënuarit që vuajnë nga probleme të shëndetit mendor. Ministri i Drejtësisë, Ulsi Manja, gjatë një takimi informal me gazetarë më 5 nëntor, bëri me dije së tashmë është marrë vendimi dhe Zaharia do të mbyllet përfundimisht. Të dënuarit që ndodhen atje, sipas ministrit, do të transferohen në mënyrë të përkohshme në bllokun 4 dhe 5 të Burgut të Shënkollit. Këto godina i janë nënshtruar rikonstruksionit dhe janë bërë gati për të dënuarit që vuajnë nga probleme të shëndetit mendor.

Ministri Manja u shpreh se ky vendim është marrë pasi edhe partnerët ndërkombëtarë në raportet për vendin tonë kanë vënë theksin gjithmonë te Burgu i Zaharisë, duke pretenduar se në këtë burgu shkelen të drejtat e njeriut. Organizatat ndërkombëtare për të drejtat e njeriut kërkojnë që të burgosurit e kësaj kategorie të dërgohen në qendra të posaçme ku marrin edhe trajtim spitalor.

Manja ka deklaruar se spitali i burgut nuk i ka të gjitha kushtet që të mundësojë trajtimin e këtyre të dënuarve, ndërkohë janë në kontakt më Ministrinë e Shëndetësisë për të përcaktuar një spital të posaçëm për këtë kategori të dënuarish. Blloku 4 dhe 5 në Shënkoll është thuajse gati dhe brenda nëntorit mund të bëhet transferimi i të dënuarve nga Zaharia. Manja nënvizoi faktin që përpara së të futen të dënuarit në këto godina, do të ftonte edhe mediat për të parë kushtet e burgut.