Lapaj kërkon mandat, “Shqipëria Bëhet” ankim në KAS për vendimin e KQZ-së

Lëvizja “Shqipëria Bëhet” ka depozituar ankesë zyrtare në Komisionin e Ankimimeve dhe Sanksioneve (KAS) kundër vendimit të Komisionit Qendror të Zgjedhjeve (KQZ), që i dha mandatin e deputetit për Qarkun Tiranë kandidates Kleana Xhuveli. Ky vendim ka shkaktuar tensione brenda koalicionit, pasi Adriatik Lapaj, drejtuesi i koalicionit “Nisma Shqipëria Bëhet” në zgjedhjet e 11 majit, pretendon se ai duhet të marrë mandatin.

Përfaqësuesit e “Shqipëria Bëhet” argumentojnë se vendimi i KQZ-së është i pavlefshëm, pasi sipas tyre kandidatët e listës së mbyllur për Tiranën, përfshirë edhe Xhuvelin, kanë dorëzuar dorëheqje nga kandidimi para nisjes së numërimit të votave në zgjedhjet parlamentare.

Në ankimimin e paraqitur pranë KAS-it, SHB kërkon që të anulohet vendimi i KQZ-së dhe të njihen zyrtarisht dorëheqjet e kandidatëve, duke lejuar kështu shpërndarjen e mandatit sipas radhës në listë dhe me respektimin e parimit të ligjshmërisë dhe vullnetit të shprehur nga kandidatët.

Në thelb, SHB thekson se KQZ duhet të ketë vepruar në përputhje me ligjin duke mos marrë në konsideratë kandidaturat e dorëhequra dhe duke e dhënë mandatin në mënyrë korrekte, përndryshe vendimi është i paligjshëm dhe cenon drejtësinë zgjedhore.

Kjo ankesë pritet të shqyrtohet së shpejti nga KAS, që do të marrë vendimin përfundimtar mbi statusin e mandatit të deputetit për Qarkun Tiranë, një çështje që po rëndon edhe më tej situatën brenda koalicionit dhe politikës së vendit.