U pezullua nga detyra, Jonaid Myzyri apelon vendimin e GJKKO

Kreu i pezulluar i Komisionit të Prokurimeve Publike, Jonaid Myzyri, është paraqitur sot në Gjykatën e Posaçme të Apelit kundër Korrupsionit dhe Krimit të Organizuar (GJKKO), ku ka ankimuar masat e sigurisë të vendosura ndaj tij nga shkalla e parë.

Myzyri kundërshton vendimin që e pezulloi nga detyra dhe detyrimin për t’u paraqitur periodikisht në organet e drejtësisë. Ai kërkon rrëzimin e këtyre masave dhe rikthimin e menjëhershëm në detyrë.

Çështja kundër tij ka të bëjë me hetime për dyshime abuzimi në procedurat e prokurimeve publike, ku po zhvillohen hetime intensive nga organet kompetente.

Gjykata e Apelit pritet të shqyrtojë në ditët në vazhdim ankimimin e Myzyrit dhe të marrë një vendim përfundimtar.