Tiranë/ Finalizohet operacioni “Destinacioni”, arrestohet 23-vjeçari që lëvizte me armë në taksi

Policia e Tiranës finalizoi operacionin “Destinacioni”, duke arrestuar një 23-vjeçar me armë zjarri në çantë, ndërsa udhëtonte me taksi për të shmangur kontrollet.

Ngjarja ndodhi në zonën e Rrugës së Dibrës, ku efektivët e Komisariatit Nr.4 ndaluan taksinë në të cilën ishin dy kushërinj, P. Gj., 23 vjeç, dhe Xh. Gj., 24 vjeç, të dy banues në Lezhë. Gjatë kontrollit në çantën e 23-vjeçarit u gjet një pistoletë me municion.

Pas veprimeve procedurale, P. Gj. u arrestua në flagrancë për “Mbajtje pa leje dhe prodhim armësh dhe municioni”. Kushëriri i tij u procedua në gjendje të lirë për “Moskallëzim krimi”, pasi nuk njoftoi autoritetet për armën.

Materialet i janë referuar Prokurorisë së Rrethit Gjyqësor Tiranë për hetime të mëtejshme. Policia apelon për bashkëpunim dhe sinjalizim të rasteve të ngjashme.