Dosja "Xibraka", Bardhi kërkesë Nikollës: Fusni në rend dite interpelancën me Ramën

Kreu i Grupit Parlamentar të Partisë Demokratike, Gazment Bardhi, i ka bërë kërkesë kryetares së Kuvendit, Lindita Nikollës, që të fus në rend të ditës interpelancën me kryeministrin Edi Rama, për përfshirjen e pretenduar të vëllait të tij, Olsit, në magazinën e drogës në Xibrakë.

“Kushtetuta dhe rregullorja të detyron të perfshish në rendin e ditës interpeleancën me Kryeministrin. Sot jam njoftuar publikisht nga Kryeministri, për refuzimin e interpelancës.

E keni shndërruar Republikën Parlamentare në Republikë Kryeminstrie. Nuk ka tagër ligjor dhe kushtetues që kryeminsitri të vendosë arsyet dhe temat e thirrjes në interpeleancë, ashtu siç nuk ka tagër të refuzojë. Kjo është shkelje e hapur kushtetuese”, thuhej në kërkesën e Bardhit drejtuar Kuvendit.

Kujtojmë se ditën e djeshme, Olsi Rama ka paditur në SPAK për ‘kallëzim të rremë’ Gazment Bardhin, lidhur me akuzat e tij për përfshirjen e vëllait të kryeministrit në trafikun e drogës.