Berisha: “Kodi i ri Penal është atentat madhor kundër fjalës së lirë”

Sali Berisha, kreu i Partisë Demokratike, ka kritikuar ashpër draftin e Kodit të ri Penal, duke e cilësuar si një “narkokod” dhe “prodhuar në shpellat e mafies”. Ai nxori në pah faktin se Prokurori i Përgjithshëm ka deklaruar se nuk është përfshirë në konsultimet për këtë ligj, çka sipas Berishës, dëshmon mungesën totale të transparencës dhe arbitraritetin në procesin e hartimit të tij nga qeveria Rama-Ulsi.

Berisha u shpreh se ky kod përmban dënime më të rënda se ato të periudhës komuniste dhe po shërben si një mjet shtypjeje për qytetarët. Ai kritikoi ashpër dispozitat që parashikojnë burg për shkelje të vogla si parkimi, vonesa në pagesën e faturave të ujit dhe energjisë, si dhe për ndërtimet në pronën private. Ndërkohë, dënimet ndaj zyrtarëve që kryejnë abuzime janë lehtësuar, duke treguar një papërputhje të theksuar në drejtësi.

Në fjalën e tij, Berisha e cilësoi këtë ligj si një “sulëm të rëndë ndaj të drejtës së fjalës së lirë dhe të denoncimit të padrejtësive”, duke theksuar se kodi synon të mbrojë individë të veçantë në sistemin e drejtësisë, si Altin Dumani dhe Irena Gjoka, të cilët sipas tij janë pjesë e problemeve në këtë sistem.

Ai paralajmëroi se drafti synon të krijojë një atmosferë frike ndaj qytetarëve dhe gazetarëve, duke i kërcënuar ata që guxojnë të kritikojnë. Berisha përmendi edhe pasuritë e dyshuara të zyrtarëve të lartë, duke akuzuar mbrojtjen që këta persona gjejnë përmes këtij kodi, dhe kritikoi ashpër manipulimin e mediave nga qeveria, duke i cilësuar ato si vegla të propagandës.

Ky reagim vjen në vazhdën e shqetësimeve nga Dhoma e Avokatisë dhe deklaratave të Prokurorit të Përgjithshëm, të cilët gjithashtu kanë theksuar se ndryshimet në Kodin Penal janë të dëmshme për sistemin e drejtësisë dhe të drejtat themelore të qytetarëve.