Shënohet viktima e parë e cunamit në Japoni/ Gruaja humb jetën teksa po i largohej dallgëve me makinë 

Tragjedia ka goditur Japoninë, teksa vala e parë e cunamit ka marrë jetën e një gruaje 58-vjeçare, duke shënuar viktimën e parë të fatkeqësisë natyrore. Ngjarja ndodhi në prefekturën Mie, ku sipas raportimeve të Asahi TV, makina e saj ka rënë nga një shkëmb në përpjekje për t’u larguar nga zona bregdetare e rrezikuar.

Autoritetet kishin dhënë paralajmërime të menjëhershme për cunami në të gjithë bregdetin lindor të Japonisë, pas aktivitetit të fuqishëm sizmik në oqeanin Paqësor. Udhëzimet për evakuim u lëshuan për dhjetëra mijëra qytetarë, ndërsa zona të tëra panë ndërprerje të aktivitetit dhe mobilizim emergjent.

Sipas të dhënave zyrtare, janë regjistruar tre valë cunami, me më të madhen që arriti lartësinë 1.3 metra. Edhe pse kjo shifër mund të duket e ulët krahasuar me cunamet shkatërruese të së kaluarës, autoritetet nuk po e marrin lehtë situatën dhe kanë bërë thirrje për kujdes maksimal dhe qëndrueshmëri larg vijës bregdetare.

Zhvillimet mbeten në ndjekje të situatës në terren, ndërsa shërbimet e emergjencës janë në gatishmëri për të përballuar çdo përkeqësim të mëtejshëm të kushteve.