A do ta kandidojë Vangjel Tavon për kreun e Bashkisë Himarë? Ja si përgjigjet Rama

Kohë më parë, mediat greke, duke iu referuar burimeve pranë Athinës zyrtare, raportuan se kryeministri Edi Rama u kishte propozuar Vangjel Tavon, për ta bërë kryebashkiak të Himarës, për të sheshuar konfliktin për çështjen e Fredi Belerit.

Një emër surprizë, pasi edhe pse Vangjel Tavo i përket minoritetit grek, ai nuk është nga Himara, si dhe ka qenë ish-ministër i LSI-së dhe deputet me këtë forcë politike.

Në atë kohë, të dy e mohuan, por më vonë, Rama e emëroi Vangjel Tavon prefekt të Qarkut Vlorë, një pozicion që u pa si për ta katapultuar më pas si kandidat për kreun e Bashkisë së Himarës, kur të shpallen zgjedhjet e parakohshme.

I pyetur në emisioni “Real Story”, nëse a do e kandidojë Vangjel Tavon për Bashkinë e Himarës, Rama deklaroi se e ka zgjedhur prefekt të Vlorës si një njeri që mund të ndihmojë nga afër edhe për të adresuar ato problematika, institucionale që lidhen edhe me bashkinë e Himarës, prandaj nuk e sheh në ndonjë pozicion tjetër.

Gjithashtu, kreu i qeverisë theksoi se për zgjedhjet në Himarë, duhet pritur vendimi i Gjykatës së Apelit dhe nëse do të ketë zgjedhje, Partia Socialiste do të ketë kandidatin e vet.