Përplasja për Veliajn në PS/ Çuçi i kërkon dorëheqjen Gogut: Ku e ke letrën e transferimit në Fier?

Deputeti socialist Bledi Çuçi i ka kërkuar dorëheqjen ministrit të Drejtësisë, Toni Gogu, duke i kërkuar letrën e transferimit të tij në burgun e Fierit. Zhvendosja e Veliajt në izolim në burgun e Fierit shkaktoi përplasje në mbledhjen e grupit parlamentar socialist, ndërsa Çuçi, megjithëse nuk pranoi të bëjë një koment për gazetarët, nuk i mohoi debatet pas dyerve të mbyllura.

Transferimi i kryebashkiakut Erion Veliaj në burgun e Fierit, të cilin ai e cilësoi si rrëmbim, shkaktoi përplasje të forta mes socialistëve në mbledhjen e grupit parlamentar. Deputeti socialist Bledi Çuçi i kërkoi dorëheqjen ministrit të Drejtësisë, Toni Gogu, dhe debatoi me të lidhur me dokumentacionin e transferimit të Veliajt nga paraburgimi i Durrësit në Fier.

Burime bënë me dije se në mbledhjen e grupit parlamentar, Çuçi i ka kërkuar letrën e transferimit të Veliajt ministrit të Drejtësisë, duke i thënë që, nëse nuk e ka me vete, duhet të japë dorëheqjen. Në përfundim të seancës plenare, i pyetur nga gazetarët, Çuçi nuk bëri komente, por as nuk i mohoi deklaratat në grupin parlamentar socialist.

Ndërsa transferimi i papritur i Veliajt në izolim në burgun e Fierit u pa si një hakmarrje e rivales së tij të vjetër në Partinë Socialiste, Belinda Balluku, kreu i grupit parlamentar socialist, Taulant Balla, nuk bëri komente për debatet që shkaktoi kjo çështje mes socialistëve, duke thënë se janë diskutime brenda grupit.

Nga ana tjetër, Balla nuk i kurseu vlerësimet për Belinda Ballukun, duke e cilësuar si një nga deputetet më aktive në qarkun e Fierit, megjithëse ish-zëvendëskryeministrja vjen në Kuvend vetëm kur duhet të ngrejë kartonin, për të plotësuar shumicën prej 84 votash.