Pas heqjes së pllakës përkujtimore të Aleks Nikës, protestuesit mesazh para kryeministrisë: 21 Janar ka përditë

Bulevardi "Dëshmorët e Kombit", përpara Kryeministrisë, është bërë sërish dëshmitar i një reagimi të fortë qytetar dhe emocional. Në asfaltin përpara selisë së qeverisë, protestuesit kanë shkruar me bojë të kuqe mesazhin: "’21 Janari ka përditë".

Ky veprim simbolik vjen  pas një ngjarjeje që ka shkaktuar indinjatë të madhe publike: heqja e pllakës përkujtimore kushtuar Aleks Nikës, njërit prej viktimave të tragjedisë së 21 Janarit 2011.

Largimi i këtij monumenti të vogël por me peshë të jashtëzakonshme kujtese, u pa nga familjarët, shoqëria civile dhe qytetarët si një tentativë për të fshirë historinë dhe për të minimizuar dhimbjen e një padrejtësie që ende kërkon epilog gjyqësor.

Bojë e kuqe në asfalt, e cila të sjell ndërmend gjakun e derdhur dhe mungesën e drejtësisë pas 15 vitesh, është një thirrje e hapur se kujtesa kolektive nuk mund të çmontohet me urdhra administrativë apo heqje pllakash.

Përmes këtij shkrimi, protestuesit përcjellin mesazhin se 21 Janari nuk është thjesht një datë e kalendarit që kujtohet një herë në vit, por një plagë e hapur e shoqërisë shqiptare që kërkon përgjegjësi, transparencë dhe drejtësi të vonuar, e cila për familjarët mbetet ende e mohuar.