Në vitin 2025, shifrat ZYRTARE: 1.507 gra të dëmtuara nga dhuna në familje, 60 % e tyre në Tiranë e Durrës

Në vitin 2025, sipas të dhënave të INSTAT, policia evidentoi 3.053 gra të dyshuara si autore të veprave penale, të cilat përbënin 6,7 % të autorëve gjithsej të evidentuar sipas veprave penale

Nga 40 vrasje me dashje të evidentuara në vitin 2025, 8 raste, ose 20,0 %, ishin vrasje për shkak të marrëdhënieve familjare.

Në vitin 2025 u regjistruan 1.507 gra të dëmtuara nga dhuna në familje. Peshën më të lartë ndaj totalit të grave të dëmtuara e kishte qarku i Tiranës (43,3 %), i ndjekur nga Durrësi (13,7 %) dhe Fieri (8,0 %).

Të miturit e dëmtuar nga veprat penale ishin 1.409, ose 7,4 % e personave të dëmtuar gjithsej: 373 vajza dhe 1.036 djem. Nga të gjitha vajzat e mitura të dëmtuara, 14,2 % ishin të dëmtuara nga krimet seksuale.

Në fund të vitit 2025, në institucionet e ekzekutimit të vendimeve penale kishte 70 gra të burgosura, ose 1,6 % të të burgosurve gjithsej. Të dhënat përfshijnë të dënuarit me burg dhe të paraburgosurit.

Sipas veprës penale, 17,1 % e grave të burgosura ishin të regjistruara për vrasje dhe 12,9 % për krime në fushën e drogës. Arsim të lartë kishin 31,4 % e grave të burgosura, kundrejt 5,9 % të burrave. Gjatë vitit 2025, 139 të burgosur ndoqën kurse të formimit profesional.
Në fund të vitit, të burgosurit e moshës 14-17 vjeç ishin 23, të gjithë djem.

Gjatë vitit 2025, Institucioni i Avokatit të Popullit regjistroi 1.739 ankesa për shkelje të pretenduara të të drejtave.

Nga këto, 1.056 u paraqitën nga burrat (60,7 %), 498 nga gratë (28,6 %) dhe 185 për grupe interesi ku përfitojnë të dyja gjinitë (10,6 %).

Burrat paraqitën më shumë ankesa për të drejtën për një proces të rregullt ligjor (264 raste, ose 25,0 % e ankesave të paraqitura nga burrat), të drejtën e pronës (205 raste, ose 19,4 %) dhe të drejtat e personave të privuar nga liria (116 raste, ose 11,0 %).

Gratë paraqitën më shumë ankesa për të drejtat e fëmijës (116 raste, ose 23,3 % e ankesave të paraqitura nga gratë), të drejtën për një proces të rregullt ligjor (80 raste, ose 16,1 %) dhe të drejtën e pronës (77 raste, ose 15,5 %).

Për të drejtat e personave të privuar nga liria u trajtuan 125 ankesa, prej të cilave 116 u paraqitën nga burrat (92,8 %) dhe 9 nga gratë (7,2 %). Kjo kategori përbënte 7,2 % të ankesave gjithsej.