Ndahet nga jeta modelja dhe aktorja Toukie Smith, ish-partnerja e Robert De Niros (FOTO)

Modelja dhe aktorja amerikane Toukie Smith ka ndërruar jetë në moshën 74-vjeçare. Ajo u bë e njohur jo vetëm për karrierën e saj në modë dhe televizion, por edhe për lidhjen e saj me aktorin e famshëm Robert De Niro, me të cilin kishte dy djem binjakë.

Smith ndërroi jetë më 4 nëntor, në një spital në Nju Jork, pas një beteje të gjatë me sklerozën e shumëfishtë. Lajmin e hidhur e bënë të ditur fëmijët e saj, Aerin dhe Julian, përmes një njoftimi familjar.

Vajza e saj, Aerin De Niro, i kushtoi një mesazh prekës së ëmës në rrjetet sociale të hënën, më 9 nëntor, duke publikuar një fotografi të tyre së bashku nga fëmijëria.

“Do të të dua gjithmonë, mami”, shkroi ajo në postimin e saj në Instagram.

Në prill të vitit 2025, Aerin kishte zbuluar publikisht se është një grua transgjinore, gjatë një interviste për revistën “Them”. Babai i saj, Robert De Niro, shprehu hapur mbështetjen dhe dashurinë për të, duke deklaruar se e kishte dashur dhe mbështetur gjithmonë si fëmijën e tij dhe se do të vazhdonte ta bënte këtë edhe pas tranzicionit të saj.

Kush ishte Toukie Smith?

Toukie Smith, emri i plotë i së cilës ishte Doris A. Smith, lindi më 25 shtator 1952 në Filadelfia të SHBA-së. Emri artistik “Toukie” vinte nga një pseudonim që i kishte vendosur gjyshja e saj, për shkak të energjisë së madhe që kishte që në fëmijëri.

Ajo studioi në Institutin e Teknologjisë së Modës dhe nisi karrierën si modele në vitin 1972. Gjatë viteve të saj në industrinë e modës, bashkëpunoi me revista të njohura si “Vogue” dhe “Ebony”, si dhe me stilistë të famshëm, përfshirë Hubert de Givenchy, Thierry Mugler, Issey Miyake dhe vëllain e saj, stilistin Willie Smith.

Në vitin 1978, ajo u shpall Modelja e Vitit nga dyqani i njohur amerikan Bloomingdale’s, duke konfirmuar pozicionin e saj në industrinë e modës.

Toukie kishte një lidhje të veçantë edhe me krijimtarinë e vëllait të saj, Willie Smith, i cili ndërroi jetë në vitin 1987, në moshën 39-vjeçare, nga komplikacionet e lidhura me AIDS-in. Ajo kishte ruajtur shumë prej veshjeve që ai kishte krijuar për të dhe kishte shprehur dëshirën për të krijuar një muze ku të ekspozonte arkivin e saj personal të modës.

Nga pasarelat në ekranin televiziv

Në fund të viteve 1980, Toukie Smith nisi të ndërtonte edhe karrierën e saj si aktore. Ajo u shfaq në disa episode të sezonit të katërt të serialit të njohur “Miami Vice”, ku interpretoi personazhin e Angie.

Në vitin 1989, iu bashkua kastit të sitcom-it “227”, në rolin e Evës, përkrah aktores Marla Gibbs. Më pas mori pjesë edhe në disa filma, mes tyre “Talkin’ Dirty After Dark”, “I Like It Like That” dhe “The Preacher’s Wife”.

Përveç modelingut dhe aktrimit, Smith u angazhua edhe në biznes, duke hapur një restorant që mbante emrin e saj në Nju Jork.

Historia e dashurisë me Robert De Niron dhe dy djemtë binjakë

Toukie Smith dhe Robert De Niro nisën lidhjen në vitin 1988, pas divorcit të aktorit nga Diahnne Abbott. Marrëdhënia e tyre pati ulje-ngritje dhe, sipas raportimeve të mediave amerikane, çifti u nda në vitin 1994, përpara se të rilidhej.

Më 20 tetor 1995, ata u bënë prindër të dy djemve binjakë, Julian dhe Aaron, të cilët erdhën në jetë përmes një nëne surrogate.

Pavarësisht lidhjes me një prej aktorëve më të famshëm të Hollywood-it, Toukie Smith zgjodhi ta mbante jetën e saj personale larg vëmendjes publike.

Në një intervistë për “Los Angeles Times”, në vitin 1990, kur u pyet për marrëdhënien me De Niron, ajo kishte dhënë një përgjigje që tregonte qartë dëshirën e saj për privatësi:

“Gjëja e mrekullueshme e një jete private është se ajo mbetet private.”