'Krijova ndjenja të pastra, ai ishte Zoti për mua“ / Blerina Matraku flet pas videove me Adi Hilën: „Jam tradhtuar dhe ....

Këngëtarja Blerina Matraku ka folur lidhur me përfshirjen e saj në videot intime të lidhura me kompozitorin Adi Hila. Ajo tha se dëshiron të tregojë versionin e saj të ngjarjeve, duke theksuar se situata nuk është ashtu siç duket, teksa u shpreh se ka paguar 10 mijë euro për një album dhe se nuk ka asnjë borxh mes tyre për këngët.

Duke iu kthyer fillimit të marrëdhënies profesionale me kompozitorin, Matraku tregoi se e kishte kërkuar për disa muaj për të bashkëpunuar, për shkak të reputacionit dhe seriozitetit të tij në fushën e muzikës. Sipas këngëtares, në vitin 2007 ajo i kërkoi Adi Hilës të realizonin një album dhe e pagoi shumën prej 10 mijë eurosh. Ajo shpjegoi se paratë i kishte mbledhur nga puna në evente, dasma dhe nga angazhimi si stjuardesë, ndërsa për këtë investim kishte marrë ndihmë edhe nga miqtë e saj.

„Ke një person të zhveshur nga çdo lloj morali dhe, edhe pse nuk e kam merituar deri në këtë pikë, duke mbajtur përgjegjësitë e mia, ke përballë vetes një person të vdekur që po frymon, të kryqëzuar. Sot jam këtu për të thënë të vërtetën time, për të mbajtur peshën që më takon dhe për të ndarë me ju një pjesë të historisë, me të cilën njerëzit mund të kuptojnë se: ‘Prit, se ky njeri nuk është fajtor aq sa e kanë fajësuar!’. Ne të gjithë bëjmë gabime, ose na ngelet një situatë në dorë ku mbetemi fajtorë edhe nëse nuk jemi. Unë jam gati që të mos dalë asgjë tjetër dhe të mbroj veten time; gjërat nuk janë ashtu siç duken.

Mund të them që kompozitorin Adi Hila e kam kërkuar me muaj me radhë për të bashkëpunuar, në sajë të profesionalizmit dhe seriozitetit që ai kishte, për emrin që gëzonte si kompozitor në vitin 2007. Ai ishte njeri shumë serioz kur u takova, me të cilin unë mund të bashkëpunoja gjatë. I kërkova një album dhe e pagova me 10 mijë euro, para të cilat i kam kursyer nga eventet, dasmat dhe puna si stjuardesë që bëja në atë kohë. Më kanë ndihmuar edhe miqtë e mi, sepse ishin shumë lekë për mua. I mblodha. Nuk i kam absolutisht asnjë lloj borxhi ndaj këngëve të mia dhe as ai nuk më ka. Menduam të merrnim pjesë në kompeticione të ndryshme me këto këngë. E kam të vështirë të flas për jetën personale me të, duke qenë se kemi bashkëpunuar gjatë — kemi bashkëpunuar 4 vite“, u shpreh ajo ekskluzivisht në „Goca dhe Gra“.

„Unë e desha këtë njeri, e mbivlerësova, e hiperbolizova dhe e vendosa ndër njerëzit më të besuar, duke menduar se ishte Zoti ky, familja dhe më pas vetja ime. Krijova ndjenja dhe ishin shumë të vërteta, të pastra e të çiltra. Isha gati për ta bërë këtë njeri të lumtur e të qetë, për t’i plotësuar atë pjesën ku ishte i ngarkuar. Kishte ngarkesa profesionale. Nuk mund të përmend shumë gjëra, sepse nuk dua të cenoj një familje. Në atë kohë unë e kam ditur të ndarë; në momentin që e kam marrë vesh që nuk ka qenë i tillë, unë u tërhoqa. Ajo falje nuk ishte e plotë, këto falje të tmerrshme nuk i meriton askush, e kjo më vë përpara përgjegjësisë së masës. Unë jam e indinjuar, nuk do ta kisha bërë atë gjë nëse e dija që do të ndodhte një shpërndarje. Nuk dija absolutisht asgjë. Unë jam e tradhtuar në këtë mes, por jo si partnere; jam e përdorur, e shitur si figurë të cilën ai e krijoi. Më rriti profesionalisht, ishte një njeri që më fliste për seriozitetin e kujdesin. Nuk mendoja që një njeri mund të kishte papërgjegjshmëri morale për të vënë kamera sigurie në dhomat e shtëpisë pa dijeninë time.

Nëse unë do ta kisha ditur që ajo aty ishte kamerë sigurie, do ta dija shumë mirë që një kamerë sigurie mund të monitorohet nga diku tjetër. Unë e dija sistem alarmi, nuk e dija që aty kishte kamerë sigurie, meqë ka pasur vjedhje asokohe“, u shpreh Matraku.