Vjosa Osmani ja merr valles në dasmën e vajzës së Ibrahim Rugovës – pamje nga ceremonia

Presidentja e Kosovës, Vjosa Osmani, ka marrë pjesë në dasmën e Teutës, vajzës së ish-presidentit historik të Kosovës, Ibrahim Rugova. E shoqëruar nga bashkëshorti i saj, Prindon Sadriu, Osmani ka qenë pjesë aktive e festës, ku është filmuar duke vallëzuar në atmosferën festive të dasmës.

E veshur me një fustan elegant të zi, ndërsa Sadriu me kostum klasik po ashtu në ngjyrë të zezë, presidentja është parë në një moment të lirshëm e të gëzuar, në respekt të familjes Rugova.

Teuta Rugova i dha fund beqarisë duke u martuar me Agron Gjeloshin, djalin e politikanit kosovar në Mal të Zi, Nik Gjeloshi. Çifti kurorëzoi dashurinë në një ceremoni martesore të mbajtur në Katedralen “Shën Nënë Tereza” në Prishtinë, me praninë e familjarëve, figurave të njohura politike dhe miqve të afërt.

Pamjet nga dasma janë publikuar në rrjete sociale, ku bie në sy pjesëmarrja dhe atmosfera e ngrohtë mes të ftuarve, përfshirë edhe momente kur presidentja Osmani i bashkohet valles tradicionale.