Vjosa Osmani i jep Dua Lipës shtetësinë e Republikës së Kosovës

Presidentja e Kosovës, Vjosa Osmani, ka nderuar këngëtaren me famë botërore Dua Lipa me shtetësinë e Kosovës, përmes një dekreti presidencial të firmosur të enjten.

Lajmin e bëri të ditur vetë Osmani në një postim në rrjetin social Facebook, ku e cilësoi artisten si një nga figurat më të rëndësishme kulturore dhe përfaqësuese të imazhit të vendit në botë.

“Nder i veçantë që sot, me dekret presidencial, t’ia jap shtetësinë e Republikës së Kosovës, Dua Lipës, një prej personaliteteve më të rëndësishme kulturore dhe artistike në historinë e vendit tonë,” – shkruan Presidentja.

Në mesazhin e saj, Osmani theksoi se Dua dhe Kosova kanë qenë gjithmonë të pandashme, duke përmendur ndikimin dhe përkushtimin që artistja ka treguar ndër vite për promovimin e vendit në arenën ndërkombëtare.

Vendimi është përshëndetur gjerësisht në rrjetet sociale, ku shumë qytetarë e kanë vlerësuar këtë akt si një mirënjohje të merituar për kontributin e jashtëzakonshëm të Dua Lipës, jo vetëm në muzikë, por edhe në përfaqësimin e identitetit dhe kulturës kosovare në mbarë botën.