Konflikt në Pazarin e Vjetër në Korçë, shoqërohen në polici dy persona (DETAJE)

Një incident i dhunshëm ka trazuar mbrëmjen e sotme zonën e Pazarit të Vjetër në qytetin e Korçës, ku një përplasje fizike mes dy personave ka kërkuar ndërhyrjen e menjëhershme të forcave të rendit.

Si pasojë e përleshjes, njëri prej të përfshirëve ka pësuar dëmtime trupore dhe është transportuar me urgjencë drejt spitalit rajonal për të marrë ndihmën e nevojshme mjekësore. Burime spitalore bëjnë me dije se i dëmtuari ndodhet jashtë çdo rreziku për jetën.

Efektivët e policisë reaguan me shpejtësi në vendngjarje, duke bërë të mundur identifikimin e menjëhershëm të dy protagonistëve të sherrit dhe shoqërimin e tyre në ambientet e komisariatit lokal.

Ndërkohë, grupi hetimor ka nisur punën dhe po merr në pyetje personat e shoqëruar për të zbardhur dinamikën e plotë të ngjarjes, si dhe shkaqet që çuan në konfliktin mes tyre.