Kërkohej nga Mali i Zi për trafik d'roge dhe organizatë kr'iminale, 52-vjeçari arrestohet në Shkodër

Një 52-vjeçar është arrestuar këtë të premte nga Policia e Shkodrës, në fshatin Zogaj, pasi ishte shpallur në kërkim nga autoritetet në Malin e Zi.

Sipas njoftimit të policisë, në pranga ka rënë Aleksandar Sekulic, 52 vjeç, i akuzuar për veprat penale “Organizata kriminale” dhe “Prodhimi dhe shitja e lëndëve narkotike”.

Ndërkohë, Interpol Tirana, në bashkëpunim me autoritetet e Malit të Zi, vijon procedurat për ekstradimin e 52-vjeçarit.

Njoftimi i Policisë:

Shërbimet e Forcës së Posaçme “Shqiponja” të DVP Shkodër, si rezultat i kontrolleve për kapjen e shtetasve në kërkim, kanë finalizuar operacionin e koduar “Zogaj”. Gjatë këtij operacioni, u kap në fshatin Zogaj, në afërsi të kufirit me Malin e Zi, dhe u arrestua provizorisht, me qëllim ekstradimin në këtë shtet, shtetasi malazez:

-A. S., 52 vjeç, banues në Podgoricë, Mal i Zi.         

Ky shtetas ishte shpallur në kërkim ndërkombëtar nga Interpol Podgorica, pasi Gjykata e Podgoricës, me vendimin e datës 27.11.2023, i ka caktuar masën e sigurisë “Arrest në burg”, për veprat penale “Organizata kriminale” dhe “Prodhimi dhe shitja e lëndëve narkotike”.