Flokët deri te këmbët i kushtuan dy kartonë të kuq kundërshtarëve/ Historia e pazakontë e Scipios

Futbollisti i Anguilës, Aedan Scipio, u bë protagonist i një prej episodeve më të pazakonta në futboll, pasi dy lojtarë kundërshtarë u ndëshkuan me karton të kuq për të njëjtin veprim: tërheqjen e flokëve të tij jashtëzakonisht të gjatë.

Anguila po humbiste 5-0 ndaj Antigua dhe Barbudës në Ligën e Kombeve të CONCACAF-it kur Scipio u aktivizua në minutën e 69-të.

Vetëm pak minuta më vonë, Keon Greene e kapi Scipion për flokët teksa po tentonte të largohej me topin. Gjyqtari e ndëshkoi menjëherë me karton të kuq.

Në minutat shtesë, Shalon Knight përsëriti të njëjtin veprim, duke e kapur Scipion për flokësh dhe duke marrë gjithashtu karton të kuq.

Kështu, Antigua dhe Barbuda, pavarësisht fitores 5-0, e mbylli ndeshjen me nëntë lojtarë. Në qendër të vëmendjes mbeti Scipio, flokët e gjatë të të cilit u kthyen në protagonistët e një prej episodeve më të veçanta të futbollit.