Rama vendos karrige me mbishkrimin "Dialog" para kryeministrisë: Mirëpres këdo, pa kushte!

Pak para nisjes së protestës së studentëve dhe të rinjve në Tiranë, në ditën e tetë të saj, mëngjesin e kësaj të marte, në ambientet e jashtme të godinës së Kryeministrisë janë vendosur disa karrige të kuqe, në formë sfere.

Në video shfaqet kryeministri Edi Rama, i cili vendos mbi to disa letra, ku shkruhet “Dialog”.

Ndërkohë, pasi i kanë parë karriget jashtë Kryeministrisë, një numër i vogël protestuesish kanë reaguar duke shkruar fjalën “Dorëheqje” mbi letrën me mbishkrimin “Dialog”.

Një prej protestuesve u shpreh se kryeministri mund ta shohë dialogun vetëm në ëndërr dhe se dialogun e bëjnë ata që shkojnë pas tij.

Më herët Kryeministri Edi Rama, tha sot se protesta e studentëve po përdoret për të kamufluar dhunën, teksa theksoi se problemi nuk janë studentët apo qytetarët që ushtrojnë të drejtën kushtetuese për të protestuar, por aktet e dhunshme.