Frika nga sulmet e Houthit, tkurret numri i anijeve në Detin e Kuq

Transporti me kontejnerë përmes Detit të Kuq ka pësuar një rënie me thuajse 30% nga viti në vit. Lajmi bëhet i ditur nga Fondi Monetar Ndërkombëtar (FMN) , ku theksohet se kjo rënie vjen për shkak të përhapjes së sulmeve të rebelëve Houthi ndaj anijeve tregtare në brigjet e Jemenit.

“Shumica e trafikut në Detin e Kuq është transport me kontejnerë, i cili është ulur me pothuajse 30 për qind,” tha Jihad Azour, drejtor i divizionit të Lindjes së Mesme dhe Azisë Qendrore të FMN-së.

Sipas platformës PortWatch të FMN-së, vëllimi i transportit përmes Kanalit të Suezit, i cili lidh Detin e Kuq me Mesdheun, ra me 37% nga 1 në 16 janar krahasuar me të njëjtën periudhë të 2023-ës.

Huthi, të cilët kontrollojnë pothuajse të gjithë Jemenin verior, kanë nisur më shumë se 35 sulme kundër anijeve në Detin e Kuq dhe Gjirin e Adenit që nga 19 nëntori , sipas Pentagonit të SHBA-së, duke penguar transportin në këtë zonë vendimtare nga ku në kushte normale kalon rreth 12% e tregtisë botërore.

Rebelët, pranë Teheranit, thonë se synojnë të bllokojnë anijet e lidhura me Izraelin që të kalojnë nëpër ujërat e Jemenit në një “shfaqje solidariteti” me palestinezët në Rripin e Gazës.

Sulmet e tyre kanë bërë që kompanitë e mëdha të transportit detar të urdhërojnë anijet e tyre që të shmangin rrugën e Kanalit të Suezit dhe të lëvizin rreth Afrikës, duke e bërë që të rritet koha e transportit si dhe kostoja.