Të infektuar në punë, emigrantët shqiptarë në Itali denoncojnë vdekjet për shkak të Covid-19

Në Itali, janë shënuar shumë denoncime nga emigrantët, me në krye shqiptarët, për pasojat e Covid-19. Një raport i dorëzuar nga Kombëtar Italian i Sigurimeve, ndaj aksidenteve në punë, tregon se gjatë 15 muajve, nga nisja e pandemisë, janë marrë 551 denoncime aksidentesh në punë për shkak të Covid e me pasojë vdekjeprurëse. 34.7% e viktimave janë regjistruar gjatë muajit prill 2020. 9.7% e numrit të përgjithshëm të viktimave të denoncuara, janë emigrantë, e shqiptarët renditen ndër më të shumtit në numër, pas atyre me kombësi peruviane.

Mësohet se janë 11.3% e shqiptarëve që kanë mbetur viktimë e Covid. Shumë më i lartë është numri i denoncimeve të punonjësve të infektuar nga Covid, gjatë procesit të punës. Nga nisja e pandemisë e deri më 31 mars 2021 në INAIL, janë prezantuar 165.528 denoncime të infektimit nga Covid për shkak të punës. 69,3%  prej tyre janë gra e  30,7% meshkuj. 13,9%  e rasteve të denoncuara janë kryer nga emigrantë ku 8.1% janë shqiptarë. 

Numri më i lartë i denoncimeve, rreth 70 mijë i përket grupmoshës nga 50 në 64 vjeç, e më i ulëti në grupmoshën mbi 64 vjeç. Po ashtu dhe numri më i lartë i viktimave Covid të denoncuar nga familja i përket grupmoshës 50-64 vjeç.