Vaksinimi me Sinovac, mjekët në Turqi: Parandalon vdekjen 100%

Katër muaj pas nisjes së fushatës së vaksinimit me Sinovac, Turqia ka deklaruar se kjo vaksinë është efikase. Deri në fillim të prillit, vendi përdori ekskluzivisht vaksinat e kompanisë Sinovac CoronaVac, më pas mori vaksinën Pfizer-BioNTech në program dhe do të shtojë edhe rusen Sputnik V në ditët në vijim. Ndërkohë që për vaksinën kineze, një nga mjekët ka deklaruar se parandalon vdekjet 100%.

“Bazuar në vëzhgimet tona në terren, mund të themi se vaksina Sinovac parandalon vdekjet dhe pranimin në spitale me 100%. Studimet kanë provuar efektivitetin e saj, por shënimet tona në terren janë edhe më të mira”, tha Nurettin Yiyit.

Duke folur për situatën në dy spitalet e tij, ai tha se rreth 4 000 punonjës të kujdesit shëndetësor morën dozën e dytë në shkurt. Që nga ajo kohë, vetëm 60 raste të COVID-19 janë raportuar mes tyre, pa shtrime në spital dhe vdekje.

Mjeku gjithashtu tha se Turqia ka hyrë në valën e re të COVID-19 pasi vaksinoi më shumë se 85% të punonjësve të kujdesit shëndetësor dhe atyre të moshës 65 vjeç e lart me vaksinën Sinovac.