Rusia nis sulmet me raketa ndaj Ukrainës, katër të vrarë dhe disa të plagosur

Forcat ruse nisën këtë të martë një valë të fuqishme sulmesh me raketa ndaj Ukrainës, duke shkaktuar vdekjen e katër personave dhe plagosjen e disa të tjerëve.

Pas dëmtimeve në infrastrukturë, në Kiev u vendosën ndërprerje të emergjencës në furnizimin me energji elektrike.

Operatori i rrjetit ukrainas, Ukrenergo, njoftoi se ndërprerjet emergjente u vendosën pas një sulmi të shkurtër, por intensiv me raketa mbi kryeqytet, sipas deklaratës së kreut të administratës ushtarake të Kievit, Tymur Tkachenko.

Kompania private ukrainase e energjisë DTEK raportoi se sulmi rus dëmtoi rëndë pajisjet në një nga termocentralet e saj.

Që nga fillimi i pushtimit në shkurt 2022, Rusia ka synuar herë pas here sistemin energjetik të Ukrainës me raketa dhe dronë, duke tentuar të ndërpresë furnizimin me energji dhe ngrohje gjatë dimrit, ndërsa mbrojtja ajrore ukrainase përpiqet të ndalojë valët e sulmeve.

Kanalet ukrainase të monitorimit në Telegram raportuan se rreth 20 raketa balistike u lëshuan brenda një ore gjatë natës, duke e cilësuar si sulmin më të madh e të qëndrueshëm deri tani këtë vit.

Raportet nuk mund të verifikoheshin në mënyrë të pavarur nga agjencia Reuters.

Forcat e armatosura të Ukrainës nuk komentuan menjëherë për shkallën e plotë të sulmit, ndërsa Rusia nuk ka bërë asnjë deklaratë për këtë sulm.

Në qytetin e Kharkivit, 30 km nga kufiri me Rusinë dhe një destinacion i shpeshtë i sulmeve ruse, guvernatori rajonal Oleh Syniehubov tha se katër persona humbën jetën gjatë një sulmi në periferi të qytetit, ndërsa gjashtë të tjerë u plagosën.

Shërbimi Shtetëror i Emergjencave të Ukrainës njoftoi se sulmi në Kharkiv goditi një terminal postar, duke shkatërruar ndërtesa dhe duke shkaktuar zjarre në një sipërfaqe prej rreth 500 metrash katrorë. Shpëtimtarët nxorën 30 persona në siguri, përfshirë dy që ishin nën rrënoja.

Në qytetin port të Odesës, pesë persona u plagosën si pasojë e sulmit rus gjatë natës. Shërbimi raportoi zjarre në një ndërtesë të re të papërdorur, një qendër fitnesi dhe një shkollë profesionale.

Dy persona u plagosën edhe si rezultat i një sulmi rus në qytetin industrial të Kryvyi Rih në Ukrainën Qendrore, ku u dëmtuan ndërtesa civile, shtëpi dhe linja gazi, sipas guvernatorit të rajonit.