Prej muajsh nuk është shfaqur në publik, Netanyahu: Khamenei është gjallë

Kryeministri izraelit Benjamin Netanyahu ka deklaruar se beson që lideri suprem i Iranit, Mojtaba Khamenei, është ende gjallë.

Khamenei nuk është shfaqur publikisht që prej momentit kur pasoi të atin, Ali Khamenei, i cili sipas raportimeve u vra gjatë sulmeve ajrore të përbashkëta mes SHBA dhe Izrael në fazat e para të luftës.

Mungesa e daljeve publike ka ngritur pikëpyetje të shumta mbi gjendjen dhe vendndodhjen e liderit të ri iranian.

Sipas raportimeve, Mojtaba Khamenei besohet të ketë mbetur i plagosur rëndë gjatë sulmit ku humbën jetën edhe pesë anëtarë të familjes së tij.

Në një intervistë për emisionin 60 Minutes në CBS, Netanyahu u shpreh:

“Mendoj se Mojtaba Khamenei është gjallë. Është e vështirë të thuhet saktësisht në çfarë gjendje ndodhet.”

Ai shtoi se lideri iranian mund të jetë i strehuar në një bunker ose në një vend të fshehtë, ndërsa po përpiqet të ruajë kontrollin politik.

“Besoj se ai po përpiqet të ushtrojë autoritetin e tij, por nuk ka të njëjtin ndikim që kishte i ati”, deklaroi Netanyahu.

Ndërkohë, agjencia iraniane Fars News raportoi se Khamenei është takuar me një komandant ushtarak dhe ka dhënë udhëzime të reja për vijimin e operacioneve dhe përballjen me kundërshtarët.