Policia britanike gjen një grua të zhdukur 52 vjet më parë

Policia britanike njoftoi sot se ka gjetur një grua e cila u zhduk nga qyteti i Coventry 52 vjet më parë.

Sheila Fox, e cila u zhduk nga Coventry në vitin 1972 kur ishte 16 vjeç, është e sigurt dhe jeton diku tjetër në vend, tha Policia e West Midlands.

Në dhjetor, policia lëshoi një apel të ri për ndihmë në gjetjen e Fox dhe postoi një foto të saj nga koha e zhdukjes së saj në uebsajtin e tyre dhe mediat sociale.

Brenda pak orëve nga njoftimi, qytetarët kanë kontaktuar policinë me informacione për Sheila Fox, shkruan BBC.

“Çdo person i zhdukur ka një histori dhe familjet dhe miqtë e tyre meritojnë të dinë se çfarë u ka ndodhur dhe shpresojmë të ribashkohen me ta”, tha rreshterja Jenna Shaw, e cila ishte e përfshirë në hetim. Aktualisht nuk dihet se në çfarë rrethanash Fox u zhduk në vitin 1972.