Padia e Trump për shpifje, gjykatësi amerikan refuzon kërkesën e BBC për pezullimin e çështjes

Një gjyqtar amerikan ka hedhur poshtë kërkesën e BBC-së për të pezulluar hetimin në padinë prej 10 miliardë dollarësh të ngritur nga Presidenti i SHBA-së Donald Trump për redaktimin e një fjalimi të tij. Trump theksoi se redaktimi e bëri të dukej sikur ai u drejtoi mbështetësve të sulmonin Kapitolin e SHBA-së.

Trump ka akuzuar transmetuesin publik të Britanisë për shpifje ndaj tij duke bashkuar pjesë të një fjalimi të 6 janarit 2021, duke përfshirë një pjesë ku ai u tha mbështetësve të marshonin drejt Kapitolit dhe një tjetër ku tha “luftoni si ferr”.

Padia e Trump pretendon se BBC shpifi dhe shkeli një ligj të Floridës që ndalon praktikat tregtare mashtruese dhe të padrejta. Ai kërkon të paktën 5 miliardë dollarë dëmshpërblim për secilën nga dy akuzat e padisë.

Gjykatësi i Qarkut Amerikan, Roy Altman hodhi poshtë kërkesën e transmetuesit britanik për të pezulluar fazën e zbulimit të bazuar në merita, kur të dyja palët mund të marrin prova nga palët e tjera në padi.

Gjykatësi tha se kërkesa e BBC-së ishte e parakohshme dhe as nuk kishte treguar se do të paragjykohej nëse pezullimi nuk miratohej. Në një urdhër të veçantë, gjykatësi caktoi një datë gjyqi dyjavore për shkurtin e vitit 2027.