Kaos në kufijtë e BE-së! Sistemi i ri EES sjell radhë dhe konfuzion, paralajmërimi: mund të duhen 2 vite për t’u stabilizuar

Sistemi i ri i hyrjeve dhe daljeve në Bashkimin Evropian (EES), i prezantuar si një hap drejt modernizimit të kontrolleve kufitare, po shkakton kaos në disa nga pikat më të ngarkuara të Evropës.

Sipas një zyrtari të BE-së, mund të duhen deri në dy vjet që sistemi të funksionojë normalisht, një paralajmërim që ka alarmuar industrinë e udhëtimeve.

Problemet lidhen kryesisht me regjistrimin biometrik të udhëtarëve, veçanërisht marrjen e gjurmëve të gishtërinjve për herë të parë në hyrje të zonës Shengen.

Zëvendësdrejtori i Frontex, Uku Särekanno, pranoi se procesi i parë i regjistrimit është “pjesa më sfiduese” e sistemit dhe se vendet e BE-së po e zbatojnë me ritme të ndryshme.

Kjo ka sjellë radhë të gjata dhe konfuzion në aeroporte dhe pika kufitare në vende si Spanja, Portugalia dhe Franca, veçanërisht gjatë sezonit turistik.

Disa shtete ende po hasin vështirësi në aplikimin e plotë të sistemit, duke krijuar situata të paqarta për udhëtarët, ndërsa në disa raste janë raportuar edhe ndryshime të papritura në procedura.

Industria e udhëtimeve ka reaguar ashpër, duke e quajtur situatën “shumë të dhimbshme” për pasagjerët dhe operatorët turistikë.

Megjithatë, zyrtarët e BE-së shpresojnë se situata do të përmirësohet gradualisht, edhe pse stabilizimi i plotë mund të zgjasë deri në dy vite.