“Stuhia e zjarrit” përfshin Francën dhe Spanjën – fenomeni ekstrem ngre alarmin në Europë, mbi 300 mijë të evakuuar

Zjarret masive që kanë përfshirë jugperëndimin e Francës kanë shkaktuar një fenomen të rrallë dhe ekstrem të njohur si “stuhi zjarri”, duke ngritur alarmin mes ekspertëve për intensifikimin e krizës së zjarreve pyjore në Europë.

Ky fenomen, i dokumentuar më parë kryesisht gjatë zjarreve shkatërruese në Shtetet e Bashkuara, Kanada dhe Australi, po shfaqet tashmë edhe në kontinentin europian, ku temperaturat e larta dhe thatësira kanë krijuar kushte ideale për përhapjen e flakëve.

Franca po përjeton një nga sezonet më të rënda të zjarreve në historinë e saj, me rreth 290 mijë hektarë tokë të djegur, sipërfaqja më e madhe e regjistruar ndonjëherë në vend. Presidenti Emmanuel Macron e ka cilësuar situatën si një nga më të rëndat që prej Luftës së Dytë Botërore.

Sipas ekspertëve, një “stuhi zjarri” krijohet kur flakët me intensitet shumë të lartë prodhojnë sasi të mëdha nxehtësie, e cila ngrihet në atmosferë dhe formon re të ngjashme me ato të stuhive. Këto re mund të gjenerojnë erëra të forta, reshje dhe madje vetëtima, duke ushqyer më tej zjarrin dhe duke e bërë përhapjen e tij pothuajse të paparashikueshme.

Qendra Europiane për Parashikime të Motit Afatmesëm (ECMWF) po verifikon nëse ky është rasti i parë i dokumentuar i një fenomeni të tillë në Francë.

Ndërkohë, kriza është përhapur edhe në Spanjë, ku zjarret kanë detyruar autoritetet, së bashku me Francën, të kërkojnë ndihmën e Bashkimit Europian. Flakët kanë kërcënuar zona të banuara, destinacione turistike, rajone të njohura për prodhimin e verës dhe infrastrukturë të rëndësishme.

Sipas të dhënave të deritanishme, mbi 300 mijë persona janë evakuuar në Francë dhe Spanjë për shkak të avancimit të zjarreve.

Shkencëtarët e lidhin përkeqësimin e situatës me ndryshimet klimatike. Reshjet e shumta gjatë dimrit favorizuan rritjen e bimësisë, ndërsa valët e gjata të të nxehtit e thanë atë, duke krijuar një sasi të madhe materiali të djegshëm.

Autoritetet paralajmërojnë se shuarja e plotë e disa vatrave mund të zgjasë me muaj, ndërsa ekspertët theksojnë se, pa masa për frenimin e ngrohjes globale, fenomene të tilla ekstreme pritet të bëhen gjithnjë e më të shpeshta në Europë.