Fotografi i AP “kap në ajër” bombën izraelite para se të rrafshojë pallatin në Bejrut

Një bombë izraelite goditi një pallat shumëkatësh në zonën Tayouneh të Bejrutit, duke shkatërruar godinën.

Fotografi i Associated Press, Hassan Ammar, i cili kishte jetuar afër ndërtesës, dëshmoi momentin tragjik ndërsa dokumentoi bombardimin nga një distancë e sigurt.

Ammar kujtoi se gjatë luftës civile 15-vjeçare të Libanit, ndërtesa ndodhej në vijën e frontit mes lagjeve myslimane dhe të krishtera. Më vonë, ai kishte vizituar shpesh këtë ndërtesë për shërbime të ndryshme dhe kishte menduar edhe të merrte një apartament atje.

Sipas ushtrisë izraelite, ndërtesa strehonte struktura të grupit militant Hezbollah. Ndërkohë, Richard Weir nga Human Rights Watch identifikoi bombën si një Mk-84 me sistem drejtues JDAM, duke theksuar rrezikun e madh që sjellin këto armë në zonat e populluara.

Ministria e Shëndetësisë e Libanit raportoi mbi 3200 viktima gjatë 13 muajve të luftës mes Izraelit dhe Hezbollahut, ku 27% e tyre janë gra dhe fëmijë.