E rëndë në Budva/ 65-vjeçari ekzekuton vëllanë dhe nipin, ulet në kafe dhe pret policinë

Një ngjarje makabre ka tronditur mëngjesin e sotëm qytetin turistik të Budvës. Dy persona – një baba dhe djali i tij – u vranë me armë zjarri nga një i afërm i tyre, 65-vjeçari S.S., që rezulton të jetë vëllai i viktimës dhe xhaxhai i të ndjerit të ri.

Krimi ndodhi rreth orës 08:00 në rrugën “Slovenska obala”, ku, sipas policisë së Budvës, autori u arrestua në vendngjarje pa tentuar arratisjen. Madje, pasi kreu vrasjen, ai është ulur qetësisht në një kafene aty pranë dhe ka pritur mbërritjen e forcave të rendit.

Burime lokale bëjnë me dije se mes familjarëve ka pasur një konflikt të vjetër, i cili u përshkallëzua ditën e djeshme pas një grindjeje për biznesin e transportit të turistëve me anije – aktivitet që viktimat dhe i dyshuari ushtronin prej vitesh. S.S. thuhet se një ditë më parë kishte kërcënuar hapur se “do e mbaronte punën”.

Sot në mëngjes, ai është afruar pranë stendës ku ndodheshin vëllai dhe dy djemtë e tij, ka nxjerrë armën dhe ka qëlluar për vdekje dy prej tyre. Djali tjetër arriti të largohej dhe shpëtoi pa lëndime.

Policia ka sekuestruar armën e krimit dhe po vijon hetimet për të dokumentuar plotësisht ngjarjen dhe motivet që çuan në aktin ekstrem.