FOTO/ Ky është Çlirim Dogani, bashkëpunëtori i dyshuar në vrasjen e 56-vjeçarit në Fier 

Policia ka publikuar sot foton e Çlirim Doganit, 55 vjeç nga Roskoveci, i cili akuzohet si bashkëpunëtor në vrasjen e 56-vjeçarit Anesti Rama, krim që ndodhi mbrëmjen e së mërkurës në fshatin Frashër të Fierit. Dogani dyshohet se ka vepruar në bashkëpunim me vajzën e viktimës, 26-vjeçaren Ermalinda Rama, me të cilën kishte një lidhje intime të fshehtë.

Hetimet tregojnë se lidhja mes çiftit ishte e kundërshtuar ashpër nga babai i vajzës. Ermalinda, e fejuar më herët tre herë, ishte ndarë në çdo rast pikërisht për shkak të ndërhyrjes së të atit.

Dyshohet se konflikti i vazhdueshëm e ka shtyrë vajzën drejt planifikimit të vrasjes, duke bashkëpunuar me të dashurin për të hequr qafe të atin, që e shihte si pengesë për jetën e saj.

Çlirim Dogani, nga ana e tij, ka mohuar çdo përfshirje në ngjarje. Ai pretendon se ndodhej në fshatin e tij gjatë momentit të krimit dhe nuk ka lidhje me vrasjen.

Pavarësisht pretendimeve të tij, hetuesit kanë dyshime të forta mbi përfshirjen e Doganit dhe po hetojnë në disa pista për të vërtetuar bashkëpunimin në ekzekutimin makabër të 56-vjeçarit.