Dyshime për abuzim me fondet e bujqësisë, u hiqet imuniteti 13 deputetëve në Greqi

Parlamenti grek ka miratuar me shumicë të gjerë kërkesën për heqjen e imunitetit të 13 deputetëve, emrat e të cilëve përmenden në dy dosje të Prokurorisë Evropiane lidhur me dyshime për keqmenaxhim të subvencioneve të agjencisë OPEKEPE.

Sipas kërkesës së kryeprokurorit evropian, heqja e imunitetit u konsiderua e domosdoshme për të mundësuar nisjen e hetimeve ndaj ligjvënësve aktivë të partisë në pushtet Demokracia e Re, mes tyre edhe ish-ministra të bujqësisë dhe mbrojtjes civile, të dyshuar për rolin e tyre në skemën e pretenduar.

Ligjvënësit grekë kanë mohuar çdo shkelje, por disa prej tyre kanë deklaruar publikisht se janë të gatshëm t’i nënshtrohen hetimit, duke kërkuar që imuniteti të hiqet për të lejuar zbardhjen e plotë të çështjes.

Në votimin nominal morën pjesë 288 deputetë, ndërsa 9 munguan. Rezultatet tregojnë një mbështetje pothuajse unanime për heqjen e imunitetit, me 285 deri në 287 vota pro dhe vetëm një numër shumë të vogël kundër në çdo rast.

Sipas mediave greke, të paktën 10 nga deputetët e përfshirë kanë votuar vetë pro heqjes së imunitetit të tyre, duke hapur rrugën për vijimin e hetimeve nga Prokuroria Evropiane.