Balla konfirmohet drejtues politik për Tiranën, zbulohet detyra që iu ngarkua në Asamble

Asambleja e Partisë Socialiste, e cila po zhvillohet prej orëve të mëngjesit në Gjirin e Lalëzit, është shoqëruar me disa ndryshime në organizimin dhe drejtimin politik të strukturave të partisë në Qarkun e Tiranës.

Sipas informacioneve të publikuara nga “Shekulli”, Taulant Balla do të vijojë të mbajë detyrën e drejtuesit politik në këtë qark, por me një fokus të ndryshëm, duke u angazhuar kryesisht në bashkitë e vogla.

Ndërkohë, në skemën e re të drejtimit politik nuk do të jenë më Erion Veliaj, Elisa Spiropali dhe Ogerta Manastirliu, të cilët deri më tani kanë pasur përgjegjësi në këtë qark.

Në vend të tyre, drejtimin politik do ta marrin zëvendëskryeministrja Albana Koçiu dhe ministri i Brendshëm, Ervin Demo. Ky i fundit është një prej emrave të përfshirë në riorganizimin e strukturave socialiste në kryeqytet.

Lëvizjet vijnë në kuadër të riorganizimit të drejtimit politik të Partisë Socialiste, ndërsa Asambleja në Gjirin e Lalëzit pritet të përcaktojë edhe orientimet e reja për funksionimin e strukturave dhe angazhimin e drejtuesve në terren.

Ndryshimet në Tiranë marrin vëmendje të veçantë për shkak të peshës politike të kryeqytetit dhe emrave që janë përfshirë në këtë riorganizim. Megjithatë, detajet e plota të ndarjes së përgjegjësive mes drejtuesve të rinj pritet të bëhen të qarta pas përfundimit të mbledhjes dhe komunikimeve zyrtare të Partisë Socialiste.