Vlora 5 ditë pa ujë/ “Pjesët e reja hidraulike vijnë sot nga Stambolli”, Rama ia faturon problemin opozitës: Ndjesë vlonjatëve të mi! Peripeci e pamerituar

Pas protestave të ditëve të fundit në Vlorë lidhur me problemin e ujit të pishëm, Kryeministri Edi Rama ka reaguar duke dhënë detaje për situatën dhe masat që po merren për zgjidhjen e saj. Ai ka deklaruar se:

"Drejt aeroportit të Stambollit për të ardhur sot brenda ditës, pjesët e reja hidraulike për riparimin e difektit të rëndë në ujësjellësin e Vlorës, ku në vitin 2009-2010 janë instaluar pjesë hidraulike jashtë standarteve, që nuk e kanë mbajtur dot më presionin e ujit dhe për pasojë tubacioni ka shpërthyer."

Kryeministri theksoi gjithashtu rëndësinë e punës së palodhur të punëtorëve të ujësjellësit të Vlorës, të cilët, nën drejtimin e inxhinierit Flauers Shoshi, po punojnë pa pushim për të zgjidhur këtë problem të rëndë që ka shqetësuar qytetin.

"Respekt për punën e palodhur të punëtorëve të ujësjellësit Vlorë, që nën drejtimin e drejtorit të përgjithshëm të Agjencisë Kombëtare të Ujësjellës-Kanalizimeve, inxhinierit të njohur Flauers Shoshi, i cili prej disa ditësh e netësh është në krye të operacionit të vështirë, po bëjnë të pamundurën për ta mbyllur këtë plagë të hapur në trupin e Vlorës prej një mine të vjetër nga një kohë e zezë për Vlorën."

Kryeministri gjithashtu u shpreh me një mesazh ngushëllues për qytetarët e Vlorës:

"Vlonjatëve të mi u them ndjesë për tërë këtë peripeci të pamerituar dhe siç thoshin gjyshet tona, plasi më në fund edhe syri i keq pas tërë këtyre viteve të mira për Vlorën, e ja që kush i do të keqen Vlorës, veç të keqen do i marrë."

Ky reagim i Kryeministrit Rama vjen pas ditëve të tensionuara që kanë përfshirë protestat e qytetarëve të Vlorës për shkak të problemeve me ujësjellësin, duke shpresuar se zgjidhja e këtij problemi do të vijë sa më shpejt dhe që qytetarët të mund të gëzojnë shërbime më të mira dhe të qëndrueshme.