Arrestohet në flagrancë autori që ndezi zjarr në varrezat e fshatit Barbullush

Policia e Vau i Dejës ka arrestuar në flagrancë Lodovik Rrethej, banor i fshatit Barbullush, pasi dyshohet se ka ndezur zjarr në varrezat e këtij fshati, duke djegur një sipërfaqe të konsiderueshme me shkurre. Zjarri ka rrezikuar seriozisht mjedisin dhe sigurinë e banorëve, megjithëse fatmirësisht varret nuk janë prekur nga flakët.

Hetimet paraprake tregojnë se i arrestuari kishte ndezur zjarre edhe në ditët e mëparshme në të njëjtin fshat, duke shkaktuar shqetësim dhe dëme të mëdha. Pas kapjes, materialet e hetimit i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme ligjore.

Policia e Shkodrës i bën thirrje qytetarëve të mos ndezin zjarre në asnjë rast, pasi ky veprim përbën rrezik të madh për jetën dhe pronën dhe do të ndiqet me forcë ligjore. Strukturat e rendit mbeten të angazhuara maksimalisht për identifikimin dhe ndëshkimin e çdo autori të zjarrvënies në rajon.