Rama: Spitali Memorial i Fierit kryen me sukses kranioplastikën e parë, shpëton jetën e 75-vjeçarit pas goditjes në tru

Spitali Memorial i Fierit realizoi për herë të parë një ndërhyrje neurokirurgjikale të avancuar, duke i dhënë shpresë për jetë një pacienti 75-vjeçar që pësoi një goditje të rëndë në tru.

Kryeministri Edi Rama njoftoi në rrjetet sociale se kranioplastika u krye me sukses pas gjashtë muajsh pritjeje dhe trajtimi të vazhdueshëm. Gjatë operacionit, pjesa e munguar e kraniotomisë iu rikthye pacientit, i cili tani ndodhet në gjendje të mirë shëndetësore dhe është larguar nga spitali.

Rama falënderoi ekipin mjekësor për profesionalizmin dhe përkushtimin, duke përmendur emrat e mjekëve: Dr. Egemen Nursoy, Dr. Klaudio Disha, Dr. Hasan Bayindir, Dr. Holta Kraja, Dr. Xhesika Hoxha, si dhe infermieren Fjorida Ago.

Kjo ndërhyrje tregon përparimin e shëndetësisë në Fier dhe shpresë për trajtime më të avancuara në vend.