Rriten kontrollet e barnave në Shqipëri, AKBPM: Zbatuam rekomandimet e KLSH, laboratori me standarde të larta…

Një raport i vitit 2024 i Kontrollit të Lartë të Shtetit tronditi opinionin publik kur konkludonte problematika thelbësore për sigurinë e barnave në Shqipëri, sidomos futja në treg e barnave pa analiza laboratorike.

Në Nënkomisionin për Auditimin e Sektorit Publik, drejtori i Agjencisë Kombëtare të Barnave dhe Pajisjeve Mjekësore, Erjon Spahiu, raportoi se një pjesë e konsiderueshme e rekomandimeve të atij auditimi janë dëgjuar edhe realizuar. Së pari standardet në laborator.

Marrja e certifikatës së akreditimit të laboratorit me në 31.01.2025 zhvillon kryerjen e testimeve në përputhje me ISO. Është standardi më i rëndësishëm që normon veprimtarinë teknike profesionale të laboratorit testues dhe kalibrues sikurse është laborator.

Sipas KLSH-së, gjatë viteve 2020-2023 në vend janë importuar 763.721 barna pa autorizim tregtimi, për të cilat nuk ishte kryer asnjë analizë laboratorike edhe pse vinin nga vende të treta si India, Kina, Koreja e Jugut, Bangladeshi dhe Singapori.

“Në vitin 2024 janë kryer 268 analiza. Në vitin 2025 janë kryer 1720 analiza. Në janar në 31 maj të vitit 2026 janë kryer 460 analiza. Masat e ndërmarra si më sipër kanë minimizuar ndjeshëm riskun të cilësisë së numrit të vogël të analizave të kryera në vitin 2021. Numri i llojit të barnave për analizë vjetore do të bëhet sipas metodologjisë si vijon: 70% e numrit total të analizave të përzgjedhura nga lista e barnave të rimbursueshme, 10% e numrit total të analizave të përzgjedhura nga importet e para, 10% e numrit total të analizave të përzgjedhura nga mostrat e barnave të të aplikohen për autorizim rinovim tregtimi 10% në total të analizave të përzgjedhura mbi bazë risku”, tha drejtori i AKBPM, Erjon Spahiu.

Një tjetër problem i evidentuar nga KLSH lidhej me sistemin e farmakovigjilencës dhe raportimin e efekteve anësore të barnave. Për këtë, AKBPM njoftoi se në janar 2025 u miratua rregullorja e re, që synon forcimin e monitorimit të sigurisë së barnave dhe rritjen e transparencës për profesionistët e shëndetit dhe qytetarët.

Ndërkohë, Ministria e Shëndetësisë po finalizon një projektligj të ri për produktet mjekësore, të harmonizuar me direktivën evropiane. Sipas përfaqësuesve të ministrisë, drafti synon të forcojë garancitë për cilësinë, sigurinë dhe efektivitetin e barnave, si dhe të përafrojë sistemin shqiptar me standardet e Bashkimit Evropian.