Rëndohet gjendja e 42-vjeçarit që u lëndua gjatë shuarjes së flakëve në Delvinë, niset drejt Traumës

Gjendja shëndetësore e një prej banorëve të lënduar nga flakët në fshatin Kopaçez të Delvinës është rënduar, duke detyruar autoritetet mjekësore ta transferojnë drejt Spitalit të Traumës në Tiranë.

42-vjeçari Apostol Zhupa, banor i zonës, ishte mes personave që po ndihmonin në përpjekjet për të shuar zjarrin që përfshiu zonën ditët e fundit. Ai pësoi djegie të shumta në pjesën e gjoksit dhe shpatullave.

Fillimisht, Zhupa u dërgua në spitalin rajonal të Sarandës, ku mori ndihmën e parë, por për shkak të gjendjes së rënduar, u transportua më pas me urgjencë drejt Tiranës për trajtim më të specializuar.

Autoritetet vendore konfirmojnë se ai është personi i dytë që pëson djegie të rënda si pasojë e zjarreve në zonën e Delvinës, teksa temperaturat ekstreme dhe era e fortë kanë vështirësuar përpjekjet për vënien nën kontroll të flakëve.