Një automjet përfshihet nga flakët në aksin rrugor Fier-Seman

Një automjet është djegur në orët e para të mëngjesit të sotëm në aksin rrugor Fier–Seman, pranë mbikalimit të trenit. Ngjarja ka shkaktuar panik te drejtuesit e tjerë të mjeteve, por fatmirësisht nuk raportohet për persona të lënduar.

Sipas të dhënave paraprake, nuk ka pasur përplasje apo aksident rrugor. Dyshimet e para flasin për një defekt teknik në vetë mjetin, i cili ka shkaktuar zjarrin.

Në vendngjarje kanë mbërritur menjëherë shërbimet zjarrfikëse dhe efektivët e policisë, të cilët kanë bërë të mundur shuarjen e flakëve dhe po punojnë për të zbardhur plotësisht rrethanat dhe shkaqet e incidentit.

Autoritetet i bëjnë apel drejtuesve të kontrollojnë në mënyrë të rregullt automjetet e tyre për të shmangur ngjarje të tilla që mund të rrezikojnë jetën dhe sigurinë në rrugë.