Kina krijon bletën e parë robotike, ja për çfarë misionesh do të përdoret

Shkencëtarët kinezë kanë arritur një hap të ri tronditës në teknologjinë e robotikës: kanë shndërruar një bletë të gjallë në një robot të kontrolluar nga njeriu. Ekipi i Institutit të Teknologjisë në Pekin ka zhvilluar një pajisje ultra të lehtë që lidhet drejtpërdrejt me trurin e insektit, duke lejuar kontroll total mbi lëvizjet e tij.

Bletët, të cilat janë të afta të mbajnë deri në 80% të peshës së trupit të tyre në nektar për distanca deri në 5 kilometra, nuk kanë asnjë problem të transportojnë një pajisje prej vetëm 74 miligramësh. Kjo pajisje përmban tre gjilpëra mikroskopike që lidhen me trurin e bletës dhe përdorin impulse elektrike të dobëta për të drejtuar fluturimin dhe lëvizjet e saj – majtas, djathtas, përpara apo pas.

Në testet e deritanishme, bletët robotike u janë bindur komandave njerëzore në 9 nga 10 raste, sipas profesorit Zhao Jieliang. Në një publikim shkencor të fundit, ai thekson se këta robotë biologjikë kanë përparësi të qarta ndaj alternativave sintetike: janë më të manovrueshëm, më të fshehtë dhe më të përshtatshëm për mjedise të vështira.

Për aplikim praktik, këto bletë robotike janë të menduara për përdorim në zbulim sekret, operacione ushtarake, antiterrorizëm, luftë kundër drogës dhe misione shpëtimi. “Trashëgojnë aftësinë natyrore për kamuflim dhe rezistencë mjedisore – gjë që i bën të paçmueshme në terren,” shprehet Zhao.

Megjithatë, zhvillimi nuk është pa sfida. Pajisja ende ka nevojë për lidhje të jashtme për furnizimin me energji, pasi bateritë aktuale janë tepër të rënda për trupin e bletës. Po ashtu, ka raste kur këmbët apo barku i insektit nuk përgjigjen ndaj komandave.

Studiuesit po punojnë për të optimizuar sinjalet e stimulimit dhe për të integruar më shumë module funksionale në pajisje, në mënyrë që robotët e së ardhmes të kenë edhe aftësi më të mira për perceptimin e mjedisit dhe të funksionojnë në mënyrë të pavarur në zona të ndërlikuara.