Vajza mbyti babain me tel, arrestohet bashkëpunëtori që ndihmoi 26-vjeçaren në krim

Policia ka vënë në pranga një tjetër person të përfshirë në vrasjen makabre të ndodhur në fshatin Frashër, ku një 26-vjeçare, E. R., vrau babanë e saj për motive të dobëta.

Pas hetimeve të thelluara, specialistët e Krimeve Kundër Personit në Policinë e Fierit arrestuan shtetasin Ç. D., 55 vjeç, nga fshati Arapaj i Roskovecit, i dyshuar si bashkëpunëtor në këtë ngjarje të rëndë.

Sipas të dhënave hetimore, dyshohet se ai ka ndihmuar 26-vjeçaren në kryerjen e vrasjes përmes mbytjes me tel, si dhe me përdorimin e sendeve të forta dhe mjeteve prerëse.

Materialet i janë referuar tashmë Prokurorisë së Fierit për veprime të mëtejshme. Ndërkohë hetimet vazhdojnë për të zbardhur tërësisht motivet dhe dinamikën e krimit.