FOTO/ 18 vatra zjarri në të gjithë vendin, dronët “Bayraktar” monitorojnë situatën nga ajri

Situata me zjarret në Shqipëri mbetet kritike. Aktualisht janë të raportuara 18 vatra aktive në disa qarqe të vendit, ndërsa Ministria e Mbrojtjes ka angazhuar dronët “Bayraktar TB2” për të monitoruar nga ajri zonat e prekura.

Lajmi u bë i ditur nga vetë ministri i Mbrojtjes, Pirro Vengu, përmes një postimi në Facebook, ku publikoi edhe pamjet e kapura nga dronët. Sipas tij, që në orët e para të mëngjesit, Forca Ajrore ka realizuar fluturime vëzhguese për të vlerësuar nivelin e rrezikut në çdo vatër zjarri.

“Ekuipazhet e Forcave Ajrore dhe efektivët e Forcave të Armatosura ndodhen në gatishmëri të plotë për të ndërhyrë kudo, me përparësi në zonat e banuara,” theksoi ministri.

Zonat e përfshira nga zjarret shtrihen nga Tropoja në veri deri në Gjirokastër në jug. Situata më e rëndë është raportuar në Delvinë, ku flakët e fuqishme detyruan autoritetet të urdhërojnë evakuimin e tre fshatrave për arsye sigurie.

Ndërkohë, strukturat e mbrojtjes civile janë në terren dhe po ndjekin nga afër zhvillimin e situatës, ndërsa pritet përkeqësim për shkak të temperaturave ekstreme që sot kapin vlerat mbi 40°C.