“Asnjë nga 5 celularët s’i përket Veliajt” / Avokati përgënjeshtron lajmet për kontrollin në burgun e Durrësit

Pesë aparate celularë janë gjetur gjatë një kontrolli të zhvilluar në orët e para të mëngjesit në sektorin B të IEVP Durrës, ku ndodhet i paraburgosur edhe kryetari i Bashkisë së Tiranës, Erion Veliaj, së bashku me disa ish-zyrtarë të tjerë.

Pas publikimit të lajmit, ka reaguar avokati i Veliajt, Plarent Ndreca, i cili ka mohuar çdo lidhje të klientit të tij me celularët e gjetur.

Në një reagim për mediat, Ndreca thekson se asnjë prej pesë aparateve nuk është gjetur në dhomën e Veliajt, në posedimin e tij apo mes sendeve personale.

PËRGËNJESHTRIM

Në lidhje me lajmin e publikuar në disa media për gjetjen e pesë aparateve celularë gjatë një kontrolli në IEVP Durrës, ku ndodhet edhe z. Erion Veliaj, sqarojmë se asnjë prej aparateve celularë të gjetur nuk i përket z. Veliaj dhe asnjë prej tyre nuk është gjetur në dhomën, posedimin apo sendet e tij personale.

Për rrjedhojë, çdo informacion apo insinuatë që e lidh z. Veliaj me aparatet e gjetura është i pavërtetë dhe i pabazuar në fakte.